प्रा.डा. सुदन झा लगातार दोस्रो वर्ष विश्वका शीर्ष २ प्रतिशत वैज्ञानिकको सूचीमा

राष्ट्रिय योजना आयोगका सदस्य तथा एआई विज्ञ प्रा. डा. सुदन झा लगातार दोस्रो वर्ष विश्वका शीर्ष २ प्रतिशत वैज्ञानिकको सूचीमा परेका छन्।

आर्टिफिसियल इन्टेलिजेन्स (एआई), इन्टरनेट अफ थिङ्ग्स (आईओटी), इमेज प्रोसेसिङ लगायतका क्षेत्रको गरेको अनुसन्धान योगदानका आधारमा तयार हुने ‘World’s Top 2% Scientists’ सूचीमा डा. झा सन् २०२५ र २०२६ दुवै वर्ष सूचीकृत भएका हुन्।

यस सूचीमा अनुसन्धान प्रकाशन, साइटेसन संख्या, एच-इन्डेक्स, एचएम-इन्डेक्स, सह-लेखकत्व तथा अनुसन्धानको समग्र प्रभावलगायतका सूचकलाई आधार मानिन्छ। 

स्ट्यानफोर्ड विश्वविद्यालयसँग सम्बन्धित अनुसन्धानकर्ताहरूले तयार पारेको यो र्‍याकिङ एल्सेभियरको Scopus डेटाबेसमा आधारित रहेको छ।

World’s Top 2% Scientists ranking मा सूचीकृत अनुसन्धानकर्ताहरूको विवरणलाई TOPSCINET ले आफ्नो विश्वव्यापी verified directory तथा network मा समेट्दै आएको छ। TOPSCINET Data Meta Lab द्वारा सञ्चालित प्लेटफर्म हो।

डा. झा विगत २५ वर्षदेखि अध्यापन, अनुसन्धान तथा उद्योग क्षेत्रमा सक्रिय छन्। उनका १०० भन्दा बढी अनुसन्धानपत्र प्रकाशित छन् भने १० वटा पुस्तक लेखन तथा सम्पादन गरेका छन्। उनका नाममा ४ वटा पेटेन्टसमेत दर्ता छन्।