ग्राहकको माग बढेपछि एनटी फाइबरका लागि अनलाइन पोर्टल सञ्चालनमा

नेपाल टेलिकमले एनटी फाइबर जडानको माग तथा सेवासम्बन्धी गुनासो अनलाइनबाटै दर्ता गर्न सकिने व्यवस्था गरेको छ। ग्राहकको माग बढेपछि अनलाइन पोर्टलको व्यवस्था गरिएको नेपाल टेलिकमका प्रवक्ता डा. कमल लामिछानेले बताए।

नयाँ व्यवस्थाअनुसार ग्राहकले घरमै बसेर अनलाइनमार्फत एनटी फाइबर जडानको माग गर्न र सेवासम्बन्धी गुनासो दर्ता गर्न सक्नेछन्। यसका लागि नेपाल टेलिकमले https://complain.ntc.net.np पोर्टल सञ्चालनमा ल्याएको छ।

उक्त पोर्टलमार्फत नयाँ फाइबर जडानको माग दर्ता गर्नुका साथै सेवा प्रयोगका क्रममा देखिएका समस्याबारे गुनासो गर्न सकिनेछ।

अनलाइन माध्यमबाट माग तथा गुनासो दर्ता गर्न सकिने भएपछि ग्राहकलाई कार्यालयमै पुग्नुपर्ने झन्झट कम हुने अपेक्षा गरिएको छ। यस व्यवस्थाले ग्राहकको माग र गुनासो व्यवस्थापनलाई थप सहज बनाउन सहयोग पुग्नेछ।