सिआइबीले लियो अध्यागमनसँग स्पेन जानेहरूको विवरण

भिजिट भिसामा स्पेन गएकाबारे अध्यागमन कार्यालय त्रिभुवन अन्तर्राष्ट्रिय विमानस्थलले केन्द्रीय अनुसन्धान ब्युरो (सिआइबी) लाई विवरण बुझाएको छ।

प्रधानमन्त्री केपी शर्मा ओली पनि सहभागी रहेको स्पेनको कार्यक्रममा केही नेपालीहरू भिजिट भिसामार्फत पुगेको र स्वदेश नफर्किएको विषय संसदमा उठेपछि सिआइबीका एसएसपी होबिन्द्र बोगटी नेतृत्वको ६ सदस्यीय समितिले असार ३१ गतेदेखि छानबिन गरिरहेको छ।

सिआइबीले अध्यागमन कार्यालय त्रिभुवन अन्तर्राष्ट्रिय विमानस्थलसँग सबैको विवरण माग गरेको थियो। कार्यालयले उक्त विवरण बुझाएको छ।

प्रधानमन्त्रीओलीसँगको प्रतिनिधि मण्डल ‘इन्टरनेशनल कन्फरेन्स अन फाइनान्सिङ फर डेभलपमेन्ट अफ युनाइटेड नेशन्स् (एफएफडि–४)’ मा सहभागी हुन असार १४ गते काठमाडौंबाट सेभिल्लाका लागि प्रस्थान गरेको थियो।उक्त भ्रमणदल असार २० गते काठमाडौं फर्किएको थियो।

सिआइबीले नयाँ दिल्लीस्थित स्पेनको दूताबाससँग उक्त कार्यक्रममा सहभागी हुन गएकाहरू सबैको भिसा विवरण माग गरेको छ।