सफ्टवेरिका कलेजका ४५० विद्यार्थी दीक्षित

बेलायतको कोभेन्ट्री विश्वविद्यालयबाट सम्बन्धन प्राप्त सफ्टवेरिका कलेज अफ आईटी एण्ड ई-कमर्सले ४५० विद्यार्थी दीक्षित गरेको छ । ३० जनवरीका दिन झम्सीखेलस्थित 'द प्लाजा'मा 'दीक्षान्त समारोह २०२६' नामक कार्यक्रम गर्दै कलेजले ४५० बढीलाई दीक्षित गरेको हो ।

दीक्षित हुनेमा स्नातकोत्तरको ब्याच २ र ३, कम्प्युटिङ र इथिकल ह्याकिङका ब्याच ३२ र ३३ का विद्यार्थी रहेका छन् । यससँगै सबै विद्यार्थीहरूले कोभेन्ट्री विश्वविद्यालयबाट मान्यता प्राप्त अन्तर्राष्ट्रिय डिग्रीहरू प्राप्त गरेका छन् ।

कलेजको दीक्षान्त कार्यक्रममा कोभेन्ट्री विश्वविद्यालयका एकेडेमिक डीन तथा कलेज अफ इन्जिनियरिङ, साइन्स एण्ड इन्भाइरोन्मेन्टका प्रमुख डा. रेबेका बट्लर, कोभेन्ट्री युनिभर्सिटी ग्रुपकी एकेडेमिक प्रो भाइस चान्सलर ज्यास्मिन सामराको उपस्थिति थियो । त्यस्तै कार्यक्रममा नेपाल चेम्बर अफ कमर्सका निवर्तमान अध्यक्ष राजेन्द्र मल्लको पनि उपस्थिति रहेको थियो । उनले दीक्षित भएका विद्यार्थीहरूलाई बधाई दिँदै नेपाल र विश्वबजारमा दक्ष आईटी जनशक्तिहरूको बढ्दो मागमा रहेको बताएका थिए ।

कार्यक्रममा बोल्दै सफ्टवेरिका कलेजका क्याम्पस प्रमुख प्रमोद पौडेलले विद्यार्थीहरूको उपलब्धिप्रति गर्व व्यक्त गरे । उनले धेरै विद्यार्थीहरूले दीक्षित हुनुअघि नै रोजगारी सुरक्षित गरिसकेको उल्लेख गर्दै यसले कलेजको उद्योग केन्द्रित पाठ्यक्रम, व्यावहारिक सिकाइ पद्धति र बलियो करियर सपोर्ट सिस्टमलाई प्रतिबिम्बित गरेको बताए ।

सफ्टवेरिका कलेजले कम्प्युटिङ, इथिकल ह्याकिङ र नवप्रविधिहरूका कार्यक्रमहरूमार्फत आफूलाई नवप्रवर्तनकारी शैक्षिक संस्थाको रूपमा स्थापित गर्दै आएको छ । संस्थाले अनुसन्धान, राष्ट्रिय तथा अन्तर्राष्ट्रिय प्रतिस्पर्धा र विश्वव्यापी एक्स्पोजर पहलहरूमा विद्यार्थीहरूको सहभागितालाई सक्रिय रूपमा प्रोत्साहन दिँदै आएको छ ।