ग्लोबल आइएमई बैंकको मोबाइल बैंकिङ एपबाटै अब आईपीओ भर्न सकिने

ग्लोबल आइएमई बैंकका ग्राहकहरूले अब बैंकको मोबाइल बैंकिङ एप ‘ग्लोबल स्मार्ट प्लस’ प्रयोग गरी सिधै आईपीओमा आवेदन दिन सक्ने भएका छन् । 

बैंकले आफ्ना ग्राहकहरूलाई डिजिटल बैंकिङमा थप सुविधा दिने उद्देश्यले यो नयाँ व्यवस्था लागु गरेको बैंकले जानकारी दिएको छ । यसअघि बैंकको मोबाइल एपबाट रकमान्तर (फन्ड ट्रान्सफर), क्यूआर पेमेन्ट तथा विभिन्न सेवाहरूको बिल भुक्तानीजस्ता सुविधाहरू उपलब्ध हुँदै आएकोमा अब आईपीओ भर्ने सुविधा पनि थपिएको हो । 

बैंकले डिजिटल सेवालाई ‘लाइफस्टाइल बैंकिङ’ मा परिणत गर्दै सेयर बजारसँग सम्बन्धित सेवाहरू एकीकृत गरेको ट्रान्जेक्सन बैंकिङ प्रमुख प्रकाश पौडेलले जानकारी दिए । उनले मोबाइल बैंकिङ अब पैसा पठाउन र टप–अप गर्नमा मात्र सीमित नरहेको बताए । उनले भने, ‘विगतमा हामीले एफडी (मुद्दती निक्षेप) खोल्ने र लोन लिने सुविधा थप्यौं । अब भने हामीले ठुलो संख्यामा रहेका ग्राहकको रुचि र आवश्यकतालाई मध्यनजर गर्दै आईपीओ भर्ने सुविधा थपेका छौँ ।’ 

पौडेलका अनुसार अब ग्राहकले आईपीओ भर्न मेरो सेयरको वेबसाइट वा अन्य कुनै प्लेटफर्म खोजिरहनु पर्दैन । ‘ग्लोबल स्मार्ट प्लस’ एपबाटै यो काम सहजै हुनेछ । उनले भने, ‘कुन कम्पनीको आईपीओ आयो । कुन वैदेशिक रोजगारीका लागि हो र कुन सर्वसाधारणका लागि हो भनेर अब न्युज पोर्टल चाहार्नु पर्दैन । एपले नै ग्राहकलाई ‘अलर्ट’ पठाउँछ । यसले गर्दा व्यस्तताका कारण आईपीओ छुट्ने समस्या समाधान हुन्छ ।’

उनले यो प्रक्रियालाई सिमलेस बनाइएको दाबी गरे । एकपटक डिम्याट र सीआरएन नम्बर राखेर भेरिफाई गरेपछि भविष्यमा आउने आईपीओहरू केही क्लिकमै भर्न सकिने उनले बताए । 

त्यस्तै, बैंकका डिजिटल बैंकिङ विभाग प्रमुख विज्ञान अधिकारीले बैंकको उद्देश्य ग्राहकलाई एउटै एपभित्र सबै वित्तीय सुविधा दिनु रहेको बताए । उनले भने, ‘हामीले बैंकिङ र पुँजी बजारलाई एकै ठाउँमा ल्याउने प्रयास गरेका छौं । ग्राहकले सेयर बजारको जानकारी लिन वा आईपीओ भर्न छुट्टै लगइन गर्न नपरोस् भन्ने हाम्रो चाहना हो ।’

पहिलो पटक प्रयोग गर्दा ग्राहकले आफ्नो डिम्याट नम्बर राखेर भेरिफाई गर्नुपर्छ । सीडीएससीको सिस्टमसँग म्याच भएपछि सीआरएन नम्बर स्वतः लिंक हुने उनले बताए । उनले दोस्रो बजारमा लगानी गर्ने वा रुचि राख्नेहरूका लागि एपमा ‘लाइभ मार्केट’ फिचर थपिएको पनि उनले जानकारी दिए ।

अधिकारीले भने, ‘यसले ग्राहकलाई सुसूचित लगानीकर्ता बन्न मद्दत गर्छ । आज मेरो पोर्टफोलियोको भ्यालु कति छ? कुन सेयरको मूल्य कति छ? भनेर हेर्न अब पैसा तिरेर अन्य एप वा पोर्टलको सब्स्क्रिप्सन लिइराख्नु पर्दैन । एपमै बाइ–सेल क्याल्कुलेटर, स्टक कम्प्यारिजन र वाचलिस्टको सुविधा छ ।’ बैंकले आफ्ना करिब २५ लाख ग्राहकलाई लक्षित गर्दै यो सुविधा ल्याएको हो । यो सुविधा सुरु भएसँगै ग्लोबल स्मार्ट प्लस प्रयोगकर्ताहरूले आईपीओ भर्नका लागि अन्य माध्यम (जस्तैः मेरो सेयर) को प्रयोग गर्नुपर्ने बाध्यता हटेको छ ।

पुरानो सुविधासँगै नयाँ सेवा थप

ग्लोबल स्मार्ट प्लस एपमार्फत बैंकले यसअघि नै रकमान्तर , क्यूआर  भुक्तानी तथा दैनिक उपभोग्य सेवाहरूको बिल भुक्तानीजस्ता विभिन्न सुविधाहरू प्रदान गर्दै आइरहेको थियो । यी सेवाहरूलाई निरन्तरता दिँदै बैंकले प्रयोगकर्ताहरूलाई थप सुविधा दिन आईपीओ आवेदनको फिचर थप गरेको हो । यो सुविधा सुरु भएसँगै ग्लोबल स्मार्ट प्लस प्रयोगकर्ताहरूले आईपीओ भर्नका लागि अन्य माध्यमहरूको प्रयोग गर्नुपर्ने बाध्यता हटेको छ । अब उप्रान्त ग्राहकले बैंकको मोबाइल बैंकिङबाटै सिधै आवेदन दिन सक्नेछन् । 

कसरी भर्ने ?

बैंकका अनुसार, यो सेवा प्रयोग गर्न ग्राहकले एपभित्र रहेको ‘आईपीओ म्यानेजमेन्ट’ अप्सनमा जानुपर्नेछ । त्यहाँ आफ्नो डिम्याट नम्बर प्रविष्ट गरेपछि प्रयोगकर्ताले तुरुन्तै सीआरएन नम्बर प्राप्त गर्न सक्नेछन् । सीआरएन नम्बर प्राप्त भएपछि हाल खुला रहेका आईपीओहरूमा सहजै आवेदन दिन सकिनेछ । त्यस्तै, बैंकले ग्राहकहरूको सुविधालाई ध्यानमा राख्दै सूचना दिने व्यवस्था पनि गरेको छ । कुनै पनि कम्पनीको आईपीओ आवेदन खुला हुँदा बैंकले आफ्ना ‘ग्लोबल स्मार्ट प्लस’ प्रयोगकर्ताहरूलाई मोबाइल बैंकिङ एपमार्फत नै जानकारी प्रदान गर्नेछ ।

यस सेवाले गर्दा ग्राहकहरूले आईपीओ खुलेको जानकारी समयमै पाउने र एपबाटै सजिलै आवेदन दिन सक्ने हुँदा सेवाग्राहीलाई ठुलो राहत मिल्ने बैंकले विश्वास लिएको छ ।