डिजाइन थिंकिङ तथा मानव–केन्द्रित नवप्रवर्तन विषयक टक सिरिजको दोस्रो सत्र सम्पन्न

हुल्ट प्राइज एट आईओई, पुल्चोक क्याम्पसले हिमा अस अफसोरको सहकार्यमा डिजाइन थिंकिङ तथा मानव–केन्द्रित नवप्रवर्तन विषयक टक सिरिजको दोस्रो सत्र सफलतापूर्वक सम्पन्न गरेको छ। पुल्चोकस्थित एम्बार्क कलेजमा हिजो दिउँसो १:३० देखि ३:०० बजेसम्म सञ्चालन भएको उक्त कार्यशालामा विद्यार्थी तथा सामाजिक प्रभाव सिर्जनामा रुचि राख्ने सहभागीहरूको उल्लेख्य उपस्थिति रहेको थियो।

कार्यक्रममा नेपालको युवा सशक्तीकरण क्षेत्रमा परिचित परिवर्तनकर्मी तथा ‘सेयरिङ अपर्चुनिटिज’ का प्रमुख कार्यकारी अधिकृत (सीईओ) समया खड्का प्रमुख वक्ताका रूपमा सहभागी थिए। आठ वर्षभन्दा बढी समयदेखि प्रशिक्षक तथा सहजकर्ताका रूपमा अनुभव बटुलेका खड्काले डिजाइन थिंकिङका आधारभूत सिद्धान्त र प्रयोगकर्ता–केन्द्रित नवप्रवर्तनका अभ्यासबारे सहभागीहरूलाई मार्गदर्शन गरेका थिए।

कोभिड कनेक्ट नेपालका सह–संस्थापक तथा हाल सेयरिङ अपर्चुनिटिजका सीईओ रहेका खड्काले युवाहरूलाई अर्थपूर्ण करियर अवसरसँग जोड्ने क्षेत्रमा नेतृत्वदायी भूमिका निर्वाह गर्दै आएका छन्। नेतृत्व विकास, समस्या समाधान र डिजाइन थिंकिङमा उनको विशेषज्ञता रहेको छ।

उनले स्थानीय समुदायदेखि एमआईटी (MIT) जस्ता अन्तर्राष्ट्रिय संस्थासम्मका विविध समूहका लागि ४० भन्दा बढी प्रशिक्षण तथा सत्र सञ्चालन गरिसकेका छन्। साथै, डिजाइन थिंकिङ र नवप्रवर्तनसम्बन्धी शैक्षिक अनुसन्धानमा सह–लेखकका रूपमा पनि योगदान दिएका छन्।

अन्तरक्रियात्मक शैलीमा सम्पन्न सत्रमा सहभागीहरूले वास्तविक समुदायका आवश्यकता सम्बोधन गर्ने समाधान कसरी विकास गर्ने भन्ने विषयमा व्यवहारिक ज्ञान हासिल गरेका थिए। मानव–केन्द्रित डिजाइनमार्फत विचारलाई प्रभावकारी सामाजिक उद्यममा रूपान्तरण गर्ने तरिकाबारे छलफल गरिएको थियो, जहाँ लक्षित प्रयोगकर्तालाई बुझ्ने र उनीहरूको वास्तविक अनुभवका आधारमा अवधारणा परिमार्जन गर्ने पक्षमा विशेष जोड दिइएको थियो।

यो कार्यशाला विशेषगरी हुल्ट प्राइज च्यालेन्ज २०२६ को तयारी गरिरहेका सहभागीहरूका लागि अत्यन्त उपयोगी सावित भएको आयोजकले जनाएको छ। सहानुभूतिमा आधारित डिजाइनको अवधारणाले सहभागीहरूलाई आफ्ना उत्पादन तथा सेवाहरू लक्षित समुदायसँग साँच्चिकै मेल खाने बनाउन आवश्यक उपकरण प्रदान गरेको थियो।

कार्यक्रमले सामाजिक उद्यमशीलता प्रवर्द्धन गर्ने र युवा नवप्रवर्तकहरूलाई व्यवहारिक सीपमार्फत सार्थक प्रभाव सिर्जना गर्न सक्षम बनाउने हुल्ट प्राइज एट आईओई, पुल्चोक क्याम्पस को निरन्तर प्रतिबद्धता झल्काएको छ।