एनपीएलको टिकट बिक्री खुला, यस्तो छ टिकट दर

सिद्धार्थ बैंक नेपाल प्रिमियर लिग (एनपीएल) को टिकट बिक्री खुला भएको छ । 

मंसिर १ देखि २७ गतेसम्म त्रिवि क्रिकेट रंगशालामा हुने दोस्रो संस्करणको एनपिएलका लागि क्यानले बिहीबार टिकट दर सार्वजनिक गर्दै बिक्री पनि खुला गरेको हो । 

पहिलो चरणमा प्रतियोगिताको पहिलो ६ दिनको खेलहरुको लागि टिकट विक्री खुल्ला गरिएको छ । टिकट डिजिटल वालेट खल्तीबाट काट्न सकिने छ । 

उदघाटन र शनिबारको टिकट मूल्य साधारणतर्फ ५ सय रूपैयाँ रहेको छ । यस्तै उदघाटन र शनिबारको प्रिमियम टिकट मूल्य १५ सय रूपैयाँ तोकिएको छ। 

यसैगरी अन्य दिनको समूह चरणको खेलको टिकट मूल्य साधारणतर्फ ५ सय रूपैयाँ र प्रिमियमतर्फ १ हजार रूपैयाँ छ । यस्तै प्लेअफ र फाइनलको साधारणतर्फ १ हजार र प्रिमियमतर्फ २ हजार रूपैयाँ टिकट रहेको छ ।