उद्योग सचिव भन्छन ‘ब्यूरोक्रेसी कानून देखाएर पन्छिन मिल्दैन’ 

उद्योग,वाणिज्य तथा आपूर्ति मन्त्रालयका सचिव रामप्रसाद घिमिरे कर्मचारीहरुले कानून देखाएर पन्छिने परिपाटी अन्त्य गर्नुपर्ने बताएका छन् । 

नेपाल आर्थिक पत्रकार संघद्वारा आयोजित अर्थतन्त्र पुनरुत्थानको आगामी बाटो नामक कार्यक्रममा बोल्दै उनले  जेनजीको आन्दोलनको जगमा बनेको सरकार रहेको भन्दै  अवसर, सुशासन र पारदर्शिता प्रमुख मागलाई सम्बोधन गर्नुपर्ने अवस्थामा ब्यूरोक्रेसी  कानून देखाएर भाग्न नमिल्ने बताएका हुन्  । उनले अन्तरिम सरकारका सीमाभित्र रहेर काम गर्नुपर्ने भन्दै सीमाभन्दा बढी प्रतिबद्धता गर्दा भोलि झन निराशा बढ्ने बताए ।  

उनले सरकारको निजी क्षेत्रप्रतिको दृष्टिकोण स्पष्ट हुनुपर्ने भन्दै अन्तरिम सरकार आफ्नो जिम्मेवारीमा केन्द्रित हुनुपर्ने बताए । ‘लोकरिझ्याइँमा लाग्नुहुँदैन, जे गर्न सकिन्छ, त्यो मात्रै घोषणा गर्नुपर्छ । अहिले भौतिक क्षतिका साथै असुरक्षित महसुस भइरहेको विषय सम्बोधन गर्नुपर्छ । आधारभूत विषयमा अध्यादेश ल्याएरै भए पनि कानुनी सुधार गर्नुपर्छ । यसमा प्रतिबद्धता देखाउनुपर्छ,’ सचिव घिमिरेले भने । 

युवाहरुमा पार्टटाइम जबको व्यवस्था गर्न नसक्दा पनि अहिलेको समस्या आएको भन्दै पढ्दै काम गर्ने परिपाटीको विकास गर्नुपर्ने उनले बताए । ‘विदेशमा यस्तो भइरहेको छ भने नेपालमा किन नगर्ने ? अहिले डिपार्टमेन्ट स्टोरमा पार्टटाइम जबको सुरुवात भइसकेको सुनेको छु । निजी क्षेत्रका सबै उद्योगी व्यवसायीले ध्यान दिनुपर्छ,’ घिमिरेले भने । 

सरकारले  नाका खुलाउन सहजिकरण गरिरहेको घिमिरेले बताए ।