को हुन् नेपालको पहिलो महिला प्रधानमन्त्री सुशीला कार्की ? 

नेपालको पहिलो महिला प्रधानमन्त्रीमा सुशीला कार्की नियुक्त भएकी छन् । मोरङमा जन्मिएकी कार्की शुक्रबार अन्तरिम सरकारको प्रमुखमा नियुक्त भएकी हुन् । 

पहिलो महिला प्रधानन्यायाधीश बनेर इतिहास रचेकी सुशीला कार्की पहिलो महिला प्रधानमन्त्री बनेर अर्को इतिहास लेख्न सफल भएकी छन् ।

अब उनको काधमा फागुन २१ गते निर्वाचन गर्नुपर्ने चुनौती छ । २००८ मा जन्मिएकी  कार्कीले विराटनगरको महेन्द्र मोरङ कलेजबाट बिए र बनारसको हिन्दु विश्वविद्यालयबाट राजनीतिशास्त्रमा स्नातकोत्तर गरेकी थिइन् ।

२०३४ मा त्रिभुवन विश्वविद्यालयबाट कानुनमा स्नातक गरेपछि उनले २०३५ मा वकालत थालेकी थिइन । वकालतको २७ वर्षपछि वरिष्ठ अधिवक्ता बनेकी उनी २०६५ मा सर्वोच्च अदालतको अस्थायी न्यायाधीश बनेकी थिइन  । २०६७ मा न्यायाधीश नियुक्त भएपछि २०७३ मा कामु प्रधानन्यायाधीश बनिन् ।

त्यसको तीन महिनामा प्रधानन्यायाधीश बनेकी थिइन । उनले १५ महिना सर्वोच्च अदालतको नेतृत्व गरिन् । उनले न्यायालयमा हुँदा भ्रष्टाचार मुद्दालाई उच्च प्राथमिकता दिएर सुनुवाइ गरेकी थिइन् । उनको स्वभाव बोल्ड र निडर छ ।